طال انتظارك

الاسعار صبحت نار ,والعمال عيشتها مرار..دى كانت احدى اللافتات اللى رفعوها عمال المحله فى الاضراب الاخير ..الامضاء كان (ضحايا الارتفاع الجنونى للاسعار,,عمال المحله)..ممكن لو انت شفت الكلام ده مكتوب فى جريده مافيش مشكله .بيحصل فى كل الجرائد المعارضه انهم يكتبو عن ارتفاع الاسعار ..بس اللى انا عايزك تاخد بالك منه ان اللى كتب الكلام ده ناس عاديين ,.,مش سياسيين او صحفيين ,,يعنى ناس فعلا انكوت بغلو الاسعار..وباستبداد اصحاب العمل سواء كانو رجال اعمال او الحكومه اللى مش مهتمه بحاجه غير انها تخلص من القطاع العام ومن العمال ,,ومن الناس الغلابه ,,ومن كل مسئوليه تجاه الحق والعدل ..الحكومه دى مش مش قادره تتحمل المسئوليه..(ارجع معايا لحادث العباره السلام مين اللى اتحمل المسئوليه,,يمكن البحر هو اللى غلطان ,,)المهم عايز اقولك ان اللى يطلع فى مظاهره او يعمل اضراب ,من العمال عشان الاسعار او الفقر ...مش بيكون قاعد يقرا عن الثوره او ميثاق حقوق الانسان لا دا بيبقى قاعد ايام وشهور فى جوع وذل وحرمان ,,عايز يوكل اولاده ومش لاقى ..عايز يتعالج ومش لاقى ,,الناس دى مابتاخدش اجازات ولا بتروح مارينا ولا شرم الشيخ ولا حتى جمصه الناس دى مطحونه ومقهوره وما حدش حاسس بيهم ..الاحزاب فى مصر مالهاش لازمه ياريت يقعدو فى بيوتهم ويسيبو المقرات بتاعتهم لدور الايتام .المسئولين مش مهتمين بحاجه دول ساعات بيشتغلو بلطجيه ودا حصل معايا شخصيا لما كنت فى مستشفى حكومى ولاقيت سوء رعايه وعدم اهتمام ,,فلما شخط فيهم لاقيت واحد عايز يضربنى اتاريه طلع مدير المستشفى ..اخر الكلام ان عمال المحله رجاله فعلا وياريت نشوف كل المقهورين رجاله زيهم .وانا واحد من المقهورين دول بقول انى بكره حسنى مبارك وبكره ايامه اللى امتلئت فساد وظلم وطغيان ..الراجل ده خلانى اكره بلدى واكره نفسى واكره الحياه واتمنى الموت ..بس من دلوقتى انا عرفت لازم اكره مين واحب مين..عرفت ان العيب كله مش فيه ..فى ناس تانيه لازم تتحمل المسئوليه........الفلاحين اللى تعبوا طول السنه فى زراعة القطن فوجئوا ان الحكومه مش عايزه القطن والتجار مش عايزينه ,,المهم تعب طول السنه هيروح كده, لا الحل انهم بعد الزرع والتعب يجمعوا المحصول ويودوه للمصنع والقبض هيكون بعد البيع يعنى حللنى على مايخدو فلوسهم..صخره .نظام الصخره رجع تانى ..احنا فرطنا فى حقوقنا والحكومه باعت الناس كلها لرجال الاعمال والمصلحه الشخصيه ..وجايين بعد كده يعملو اعلانات فى التليفزيون عن اللى لحق القطر واللى قعد على القهوه وفاته القطر يعنى العيب فى الشباب مش فى الحكومه الشباب اللى بيشتغل طول السنه ويسبوهم لرجال الاعمال على مايبيعو المحصول الشباب اللى جه ياخد قروض والحكومه ضيقت عليهم .الشباب اللى بيسافر بره والكفيل يزلهم فى دول الخليج .(.الشقيقه.).والقنصليات بتاعتنا مش واخده بالها..جايز بيفتحوا بالليل بعد الناس مابتنام..العيب فينا( جايز ) يقولو اللى عايزين يقولوه المهم اننا سوف نبقى للابد

طال انتظارك
ايتها الرحمة الابديه
لترسمى لنا فى الافق البعيد طيفك
هيا,,,,لتبعثى فوق رفات قلوبنا روحك
لتحيى فينا ....روحنا.